Too Hengel nog old-Hengel was

 

Eerder verschenen op de website:www.oldhengel.nl

Gerrit Langeler, veearts in Laren, maar geboren in Hengelo, begon op 20 december 1955 een lezing voor het Nut met het volgende rijm op Oud-Hengelo, die ook in De Graafschapbode werd gepubliceerd:

Too Hengel nog old-Hengel was
De karmse in volle fleur
En Giegengack met zien mölle ston
Bi’j Bovenkerk veur de deur,
Too Jan Canters nog ’t vaandel sloog
En ’t hele spul noa de Bleike toog,
Too Olbert Bretveld bieleman was
En de Kikvors spartelde in d’n plas,
Wie Bendelaar nog hef ekend
Die wet nog wel misschien
Dat e altied tegen de vrouwluu zeij:
Al’j mooie kinder kriegen wilt
Kiek dan maor ’s noa mien.
Too de omnibus deur ’t darp hen rolde
En Gebbink brag de pos,
Too ’t altied, altied zes uur was
Da’j ’t wel geleuven mos,
Too Kievenkamp nog nachwach was
Met Jan Buursink dee zien plich,
Too met de leere en de petroleumkan
Heel Hengel wier verlich,
Too Gert Denkers nog de scheerbaas was
Met ’t beksken onder d’n arm
Inzepen dee e met de hand
Neet altied met verstand.
Bi’j ’t feest van Koning Willem drie
In achttien negen en tachtig
Dat vonnen ze allemaol prachtig,
Too had e Van Dillen inezeept
En als een trouw Oranjeklant
Zongen beide too ’t hoogste lied
Voor Vorst en Vaderland
En as de Commissaris kwam
Ens in de vier jaor
Dan ko’ d’r vaste van op an
Dan was de straote klaor.
Ik wet nog dat e in de schole kwam
Da’s heel lange eleen.
Too de Regelinkstraot nog de Polsbroek was,
Dee name, dee moes weg
Dat heb ze op ’t gemeentehuus
Heel netjes oaverleg.
Maor ik wet nog hoe ’t vrogger was
En Jacobs d’r nog wonnen
Dee daags met sikkebökskes kruun
En bikkels kopen konnen.

Rebecca was ’n fikse deern
Die maken graag ’n proatjen
En ik heb zo vake ’t lich uut edaon
In de kleine synagoge
In ’t aardige Jodenstroatjen.
Too Concordia wier operich
Too ging ’t nog moar zo, zo
Moar ’t zol toch wel wat wodden
Met acht man en de Co
Ok maakten ze wel stroatmuziek
Union in Zelhem en in Vodden.
Too juffrouw Hilferink vroedvrouw was
Aanbidders had ze zat,
Moar de juffrouw bleef ongetrouwd
De heren hadden gin vat
Drie man tegeliek  …. ‘ ewaogd
Ze wieren d….. met eplaogd
Want de juffrouw …. Schaakmat.
Too Gijsbers nog veldwachters was
Doar hadde wi’j ..eet op staon
A’j bi’j Van Mens an de belle trokken
Of de rikketik leetrn goan
A’j Koffie Harm soms hadden eplaogd
Dan wier i’j grondig ondervraogd
Dan wodden ’t ow soms benauwd.
Moar Gijsbers kennen moar eene straf
“Iej bunt gewaareschouwd”
Met Poasen ginge wi’j eier rollen
Doar an de Reurlse weg
En as Regelinkdiek ’s proaten kon
Doar is heel wat oaverleg.